[菲聞] 王菲李亞鵬宣布離婚
今日黑色星期五，同第二任丈夫李亞鵬一直表現恩愛嘅王菲，
今晚忽然於微博寫道:“這一世，夫妻緣盡至此，我還好，你也保重。”
再加一個微笑公仔，宣布同李亞鵬8年夫妻情盡。
李亞鵬亦於微博發聲明：
“我要的是一個家庭，你卻注定是一個傳奇，懷念十年中所有的美好時光。
愛你如初，很遺憾，放手一是我唯一所能為你做的。
希望你現在是快樂的，我的高中女生。
另為了避免大家的臆測，在此公告所有關心我們的朋友：
1、我們的女兒李嫣以後會跟我在一起生活，還請大家關照。
2、我們從戀愛到結婚，財務一直是獨立的，所以也不存在財產分配的問題。
祝大家一切都好，明天太陽會照常升起！”
2005年7月28日，當年35歲嘅王菲，同33歲內地小生李亞鵬拍拖兩年，
在李亞鵬胞兄李亞偉及一名好友陪同下，
正式於李亞鵬家鄉烏魯木齊市嘅民政局登記結婚，王菲從此成為李太。
5月仍然恩愛來港為“嫣然基金”籌款
王菲李亞鵬離婚，十分之突然。其實王菲同李亞鵬一向恩愛，
今年5月才齊齊來港出席他們自己成立的“嫣然天使基金會”籌款活動，
當時完全未有異樣。
當晚的籌款更有菲鵬的愛女李嫣的畫作拍賣，而當晚晚宴亦正是嫣兒生日，
更成功籌得5,600萬善款。
不過王菲這晚未有開金口獻唱，不過廿四孝阿媽的她抱著愛女嫣兒喺台下欣賞。
戲如人生李亞鵬日前仲大談浪漫史
今日王菲忽然宣布離婚，但三日前，即9月9日，李亞鵬出席為愛女李嫣成立的
“嫣然天使基金”活動時——慈善花店“嫣之花”開幕日，
李亞鵬與劉璇出席剪彩時，仍有分享同王菲嘅浪漫事。李亞鵬笑言：
“自己沒怎麼送過花，只有那麼一次，就是結婚前，想要送花給太太王菲，
但猶豫了再三，還是沒辦法直接送給她，而是選擇把花藏在車裡，讓她自然發現。”
上月8日，王菲44歲生日，李亞鵬於凌晨近1時，於微博送上愛的祝福：
“雖然遠隔萬里，但我的目光深遠，足以穿過這海天一色：
生日快樂！我的高中女生”，再加一張海闊天空相，甜蜜又肉麻。
估唔到如今卻宣布離婚。
大女靖童早知父母情已逝：“I Can't Sleep.”
王菲微博暗示同老公李亞鵬離婚，8年婚姻就咁玩完，焦點除咗兩位男女主角之外，
當然仲有囡囡竇靖童(童童)。媽媽與親生爸爸竇唯於99年離婚，
當時童童已經很難過；如今媽媽又同第二任爸爸離婚，16歲女就要經歷兩度至親離異，
情緒自是大受影響。
童童未有於微博講心事，但於其instagram、早兩星期前就已經post過一幅相，
寫住話“I Can't Sleep”，再加一個caption話：“Sleepless Michigan”，
睇嚟當時童童身處密歇根州，失眠夜令佢要寄情社交網…
咁究竟因咩事令童童瞓唔著？唔通，佢一早就知王菲同李亞鵬情不再？
疑似小三苗圃：今天很開心
王菲離婚，暗湧其實一直都有，兩人05年結婚，但07年李亞鵬已爆出小三疑雲，
當時他拍劇與內地女星苗圃被指撻著，更被影到兩個人拖手食飯，同一般情侶無異。
當時李亞鵬嘅經理人公司回應話:“大家都是好朋友，一起吃飯沒什麼。”
相隔咁多年，雖然李亞鵬未有被人影到與苗圃再有什麼進一步發展，
但巧合是今天苗圃於微博寫住:“今天對於我來講….一個字形容…開心”
實在令人好容易聯想到她的開心，可能與李亞鵬與離婚有關。
好友劉嘉玲：中間好多問題存在
王菲同劉嘉玲向來老友鬼鬼，王菲今晚於微博突爆離婚，李亞鵬亦於微博證實。
作為二人好友的劉嘉玲，今年五月先至出席兩夫婦喺香港舉行嘅
嫣然天使基金籌款活動，當日菲鵬表現恩愛，全然不像有離婚先兆。
劉嘉玲接受電話訪問，透露謂：“我知道佢哋呢個決定都有一段時間，
作為第三者好難調停，佢哋兩個如果走到呢步，中間好多問題存在，
外人好難，並非外間人可以插手。”
對於李亞鵬傳有小三呢件事，嘉玲代為澄清：“我所知李亞鵬系冇第三者，
佢唔係啲咁嘅人，大家唔好捕風捉影，對佢唔公平。佢對人好投入，
做事好認真，我知佢好努力經營呢段婚姻，性格唔夾都冇辦法。”
可知此刻二人關係？嘉玲話：“佢哋關係必可再見亦是朋友。”
問到王菲心情如何，嘉玲表示：“佢系冷靜又理智嘅人，佢依家好堅強，
佢可以熬過去。”嘉玲知王菲同李亞鵬仲未商談如何處理嫣然天使基金，
相信會繼續，而嫣然天使基金今日亦已發聲明話會繼續運作。
王菲命運判官？
蘇民峰唔意外：佢條命唔係靠老公
44歲嘅王菲第二度離婚，真係嚟得突然，相方亦已於微博發出聲明，8年情劃上句號。
風水師蘇民峰93年為王菲批命，今次王菲感情路又遇上阻滯，當然要問問佢，
不過蘇師傅就覺得「唔意外」：「因為佢(王菲)條命唔係靠老公。
相好易睇，女人個鼻最重要，你見啲女人可以嫁入豪門，通常個鼻樑又高又直又長；
鼻樑低呢，就叫『繼室鼻』，要嫁俾結過婚嘅男士，先可以有美滿姻緣…」
王菲則屬後者。
當年被譽為「王菲御用風水師」的蘇民峰，之前都對霆鋒同王菲拍拖有保留，
話佢哋年紀有差距，所以早已預計二人的感情不會開花結果。
再問蘇師傅，究竟當年王菲嘅自傳式歌曲《出路》，入講嘅歌詞
「可算命說我們的婚姻並沒那麼如意，說你到四十歲的時候會有外遇…」
個算命師傅係咪佢本人？蘇民峰乾脆答：「93年成十年前我都唔記得喇！
0依家都2013啦！」
其實，一直有人話蘇早喺王菲同竇唯結婚之前，就「算出」兩人將會離婚，
仲話：「我當時就看出，王菲如果30歲前結婚，30歲後就有離婚的風險。 」
結果，喺1999年，30歲嘅王菲最後同竇唯離婚。
04年，蘇民峰又預測王菲同李亞鵬05年可能會結婚，唔係就會分手，
於是兩人就喺嗰年結婚，連日子都由蘇民峰擇埋。蘇民峰其後又話王菲嘅「懶運」
會喺2010年完結，結果佢真係復出。
李亞鵬投資4年蝕半億王菲復出撲水
現年41歲的李亞鵬，在內地曾經是四大小生之一，05年他與王菲結婚，
起初這段婚姻都不被睇好，始終王菲是中港台的紅歌星，
而李亞鵬事業一直未能更上一層樓，更漸漸退出幕前，
2010年更宣佈不再做演員，專心從商。
其實李亞鵬一直有投資拍片，05年兩人結婚，如意算盤本來是王菲退隱，
李亞鵬做他的製作公司老闆養家，04年他成立「美麗春天文化公司」，
頭炮劇集《海灘》成功，令佢雄心壯志，將成副身家放落公司，
王菲更加碼支持，之後更於內地數個地方開酒吧。
當初王菲覺得老公有生意頭腦，一丟就成千萬落去，
但之後李亞鵬公司出品的劇集反應麻麻，有份投資的電影《聖殿》及
《目擊者》票房慘淡，蝕到攤攤腰。其中有份投資的酒吧生意最後更淪為色情場所，
生意愈做愈差，而09年有報道話，短短四年間，阿菲前後總共掟咗成4000萬落去，
半億就咁冇咗，就於此時，王菲宣佈復出以天價2000萬接下洗頭水廣告。
2010年王菲借住入行20年呢個機會開始內地巡迴演唱會，當時李亞鵬出曬口撐老婆：
「作為她的歌迷，我當然希望她復出，她不唱歌實在太浪費。」
點解依家又暗示王菲唔顧家呢？
轉自：
http://www.ihktv.com/faye-wong-yapeng-divorce.html
附上─
菲的微博：http://weibo.com/1629810574/A9ifYbmu9?mod=weibotime
李亞鵬的微博： http://weibo.com/1829847745/A9izG4MvD?mod=weibotime
【王菲抵京】：http://weibo.com/1642591402/A9kduBTgO
菲返京車中照：http://weibo.com/1557355344/A9klkpGr5
劉嘉玲受訪：http://ppt.cc/GSMa
--
※ 發信站: 批踢踢實業坊(ptt.cc)
◆ From: 42.71.1.66
※ 編輯: JLF 來自: 42.71.1.66 (09/14 04:15)
推
09/14 16:47, , 1F
09/14 16:47, 1F
推
09/14 22:19, , 2F
09/14 22:19, 2F
討論串 (同標題文章)
FayeWong 近期熱門文章
PTT偶像團體區 即時熱門文章
