[新聞] 《花田囍事》賀歲檔首日最強

看板Louis_Koo (古天樂)作者yilingkoo (金錢誘罪)時間14年前 (2010/02/13 16:42)推噓0(0推 0噓 0→)

留言0則, 0人參與討論串1/1

10年02月13日　蘋果日報　四套華語賀歲片《花田囍事2010》、《72家租客》、《錦衣衛》同《蘇乞兒》前日搶閘上畫，為咗成為賀歲片票房第一，幾套戲嘅演員連日嚟都鋪天蓋地咁出席宣傳活動。黃百鳴噚日率領吳君如、古天樂同鄭中基坐開篷巴士出現九龍灣，為《花田》造勢，其間更向途人大派用嚟買飛嘅10蚊代用券利是，巿民爭相領取。《錦衣衛》落後今年賀歲票房爭崩頭，根據香港影業協會資料顯示，以首日開畫票房計算，47間戲院上映嘅《花田》暫時以905000港元暫時第一，《72家租客》則有42間戲院上映，以70萬票房排第二，《蘇》片就收51萬屈居第三，遠遠拋離35萬嘅《錦》片。其中《花田》同《 72家租客》日前分別上咗５場特別場，累積票房計，前者已收１７１萬，贏對手30萬。《花田》優先場加首日開畫票房暫時領先贏第一仗，有份主演嘅君如講笑話唔會好似有人口出狂言踩其他人，而鄭中基就信心爆棚話會蟬聯賀歲片第一，黃百鳴又話內地首日票房升咗７成。咁係咪已經剝咗曾志偉棚牙？黃百鳴笑笑口話係應該贏志偉：「已經留咗位畀志偉睇《花田》，但驚佢唔敢嚟，今次目標係要同自己鬥。」君如做埋宣傳就趕住飛泰國會合屋企人過年，佢話呢次黃百鳴同志偉嘅牙骱戰其實係宣傳好橋，君如仲大講爛ｇag：「我稍後會包場同囡囡睇《花田》，不過我唔係要谷票房，因為我唔係牆紙『包牆』。」 http://202.85.162.86/images/apple-photos/apple/20100213/large/13ec5p1n.jpg