[新聞] 何韻詩台灣大步走 打破墨守成規(非原標)
(請忽略聳動的新聞標題 其實是篇蠻深入的報導)
【何韻詩破社會規條大膽去愛】 東方日報2011-06-11
挾已故巨星梅艷芳徒弟之名勇闖樂壇的何韻詩，轉眼在樂壇打滾十個年頭，面對香港樂壇
每況愈下，她直指全因各大唱片公司斤斤計較所致，一度萌退出念頭的她避走台灣「抖氣
」，未料在台灣創出佳績，足證勇於創新的她絕不墨守成規，難怪她高呼：「證明用自己
步伐去行係work！」
大膽講祖兒
事業得意，愛情路上阿詩跟密友容祖兒似被認定是一對，對於「同性戀」這三字，阿詩認
為在這年代思想應該要開放……
呢個係我覺得唔應該再去考究嘅課題，如果喺呢個年代都覺得呢三個字（同性戀）係禁忌
，咁我覺得大家唔好繼續活喺三十年代，要返番呢個年代！每個人都有可能愛上任何性別
嘅人，只不過你會唔會受呢個社會嘅所謂規條去框住你。
冇確切答案
其實所謂愛，係你去愛嗰個人嘅內在而唔係外在，我唔會答到呢個（指同性戀）好確實嘅
問題，依家同永遠都係唔可能確實咁話我只係鍾意某一性別嘅人，等如有啲男人或女人結
過婚、生完仔，佢哋都可以同同性嘅人一齊，依家你同男仔或女仔拍拖，唔代表他日會唔
會同另一性別嘅人一齊。祖兒依家同我係好朋友關係，父母甚少追問我啲感情事，反而傳
媒問得多過佢哋。
台灣大步走
阿詩隻身避走台灣，心靈得以醫治，讓她重拾自信及能量，以自家步伐在台灣打開一片天
地，帶來了滿足感……
離開之前我對香港徹底失望，真係對呢個地方成個制度、成件事好失望，好彩當時離開去
咗台灣發展，壓力細咗，困住喺一個地方實會鑽牛角尖，但係離開咗睇到個大環境，搵番
好多自己需要嘅能量，台灣市場對我來講發展絕對好啲，同埋佢哋真係有時間去消化你嘅
嘢。
打破墨守成規
香港基本上一隻碟嘅壽命大概得一個月，之後大家就好心急問點解咁耐冇新歌？有時睇番
真係對呢個樂壇心痛，有人會覺得我點解咁遲先出國語碟，我慶幸等咗咁多年考慮清楚所
有方向先出呢隻碟，如果好多年前自己唔係好肯定應該點做，趕住去做碟，得出來嘅效果
唔係依家咁。
我一路用自己步伐去行，證實咗咁樣係最適合我嘅方法，係work嘅，加埋入圍（金曲獎）
係最開心一樣嘢，證明自己選擇方法雖然比其他人慢，但可以有個成果，希望能做到一個
個案畀香港歌手睇——有好多方法去做同一件事，成日好多人會話你咁做唔得架，要點要
點，香港最興係咁，大家只係覺得墨守成規就得，其實真係有其他嘅路可以行囉。
嗟嘆港樂壇
受到香港樂壇不健康的影響，令一眾有才華、有潛質的歌手大感沮喪，阿詩也一度萌退出
歌壇念頭，歸根究柢是……
香港樂壇唔健康好多年，令我覺得好可惜，做香港歌手係好辛苦，壓力來自唔係我點去做
好音樂，係做好嘅音樂點令呢個台buy我，咁就多咗一層考慮，唔係單純做好音樂、顧及
音樂質素，香港人係先抱住唔係欣賞嘅角度，太挑剔喇，令歌手因為咁覺得有壓力同沮喪
。點解香港人都唔支持香港嘅音樂人？加上我哋樂壇唔夠團結，尤其係唱片公司成日斤斤
計較，呢樣嘢係整死樂壇其中一個原因！
舊思想好忟憎
諗吓八十年代，前輩歌手會提攜新人，我就係個好例子，係梅姐（梅艷芳）提攜出來，前
輩一定去幫一啲佢覺得有潛質嘅新人，但依家要計好多嘢：係咪自己公司？有冇利益衝突
？明明有好多有影響力嘅歌手，可能佢哋都想幫，若果唱片公司介意，佢哋怕麻煩咪費事
做囉，慢慢變成自己顧自己，只要自己好就得架喇！加上依家好多人都仲係舊式思想，真
係好忟憎，為樂壇好唔應該有咁多計較！
香港樂壇有一個趨向就係年底想喺邊個台攞咩獎，就因應需求做啲歌去符合嗰個媒體口味
，變咗大家一窩蜂去做同一樣嘢，樂壇點會健康？
爭金曲落淚
能打入台灣金曲獎候選《最佳國語女歌手》及《最佳單曲製作人》，是阿詩預料之外，抱
平常心的她睇好樂壇前輩萬芳……
我睇好前輩萬芳，佢唱功嗰種感動係最難，莫文蔚（Karen）攞過，萬芳未攞過，同埋
Karen有其他提名，當然都希望佢攞，始終今次大家都係香港歌手進軍國語市場，五佔其
二已經好開心，我唔會因為咁覺得飄飄然，做咗咁多年都係腳踏實地行，只係覺得好感動
，冇諗過喺另一個地方發展，反而被認同多過自己地方！
認受性更加高
知道入圍嗰一刻眼淚真係湧出來，咁就未至於飲泣，第一時間打畀一齊做呢隻碟嘅同事，
咁梗有同容祖兒分享，佢都好開心，佢都係睇住我用自己嘅方法去行，相信佢冇喊，總之
大家都好激動同戥我開心。其實台灣金曲獎比香港頒獎禮認受性更高，因為每年評審嘅人
唔一樣，唔會知道邊個係評審而去巴結佢，唔同香港。
家人要忍讓
阿詩出生於小康之家，跟家人感情深厚，關係牢不可破，她卻自爆彼此因經常見面而不時
發生摩擦、鬧交……
同家人都係繼續學習點去更好地相處，呢個係我哋永遠學習嘅課題，你對最親嘅人永遠都
有一種放任態度，好難控制自己反應，當然係每一次都會怪責自己，每個人都會經歷到呢
啲事，同埋尤其係我父母，咁參與我嘅生活，亦因為咁容易有衝突，好彩每次鬧完過幾日
又冇事。反而我同阿哥會互相忍讓，佢係個幾火爆嘅人，深藏不露，但其實佢係個活火山
，我又係個好性急嘅人，因為咁同佢反而比較少直接摩擦，大家都知互相火爆，加上好少
一齊做嘢就會盡量遷就。
口述：何韻詩
筆錄：羅宛君
攝影：沈健程
髮型：Karman Wong@Hip Hair Culture
化妝：Meimei Chu
形象：Ricky Sham@1st atelier
場地：蘭桂坊酒店＠九如坊
原新聞連結：http://goo.gl/rrNSX
新聞圖片：http://goo.gl/tWahS http://goo.gl/bwSF0
http://goo.gl/vjhby http://goo.gl/rWyE7
--
※ 發信站: 批踢踢實業坊(ptt.cc)
※ 編輯: SmileEgg 來自: 115.43.222.8 (06/11 09:41)
HOCC 近期熱門文章
PTT偶像團體區 即時熱門文章
